Maumivu ya Misuli na Mifupa katika Sehemu ya Chini ya Mgongo

Maumivu ya misuli na mifupa katika sehemu ya chini ya mgongo ni hali inayotokea sana na kwa kawaida huathiri misuli na mifupa ya sehemu ya chini ya mgongo. Takriban asilimia 40 ya watu watakabiliwa na hali hii wakati fulani wa maisha yao. 

Maumivu yanaweza kutokea ghafla au taratibu kwa kipindi cha wiki au miezi kadhaa. Ajali, kuvunjika mifupa, upasuaji, kazi nzito, micheo ya kutumia nguvu sana, na matatizo ya kiafya, kama vile inflamesheni ya viungo (arthritis) na osteoarthritis kwa kawaida huweza kusababisha maumivu ya sehemu ya chini ya mgongo.Maumivu ya mgongo, kukakamaa kwa misuli ya mgongo, na mshtuko wa ghafla wa misuli ya mgongo (back muscle spasms) ni dalili za kawaida kutokea. Matibabu hutegemea sababu ya maumivu.

Misuli ya mgongo karibu wakati wote hutumika, na kwasababu hii, huwa na kawaida ya kujeruhiwa mara kwa mara. Sababu za kawaida za kuumia kwa misuli ya mgongo ni uinuaji wa vitu vizito na wakati mwili unaposogea katika namna isiyo ya kawaida.

Katika visa vingi, maumivu hayahusiani na ugonjwa sugu, bali ni kutokana na kuteguka kwa misuli au kano. Maumivu ya kudumu na endelevu yanaweza kuwa yanasababishwa na pingili ya uti wa mgongo kutoka katika nafasi yake au matatizo ya viungo vya uti wa mgongo. 

Unene kupita kiasi, msongo wa mawazo, kunyanyua vitu vizito, na kazi zinazohusisha kuinama mara kwa mara ni mambo ambayo huongeza hatari ya kupata maumivu katika sehemu ya chini ya mgongo au maumivu ya kiuno.

Dalili za kawaida zaidi kujitokeza ni: 

• Maumivu sehemu ya chini ya mgongo
• wakati mwingine maumivu kwenye makalio

Maumivu haya yanaweza kuwa makali au yasiyo makali, yenye hisia ya kuchomwachomwa au hisia kama ya kuungua. Maumivu yanaweza kutofautiana baina ya mtu na mtu na pia yanaweza kuwa maumivu yanayosambaa hadi kwenye nyonga au hata eneo la chini zaidi. Usogeaji wa mwili katika namna fulani huweza kusababisha maumivu kupungua au kuongezeka. Misuli ya mgongo inaweza kukakamaa. 1

Utambuzi kwa kawaida hufanyika kulingana na dalili na uchunguzi wa kimwili. Hii huweza kujumuisha kuchunguza mgongo na miguu inavyosogea. Kipimo cha X-ray kwa kawaida huwa hakihitajiki isipokuwa maumivu yanapodumu kwa muda mrefu au kuna dalili zinazoweza kuwa zinasababishwa na magonjwa mabaya zaidi. 2

Matibabu ya maumivu katika sehemu ya chini ya mgongo au kiuno yanajumuisha dawa za kupunguza maumivu na mazoezi ya mgongo. Dawa za kutuliza maumivu, kama vile paracetamol na ibuprofen mara nyingi husaidia kupunguza maumivu ya mgongo. 

Watu wenye maumivu ya mgongo wanapaswa kuendelea na shughuli zao za kila siku na kufanya mazoezi mepesi, kama vile kutembea, mapema iwezekanavyo. Kuupumzisha mgongo kwa muda mrefu kunaweza kusababisha dalili kuwa mbaya zaidi na kufanya iwe rahisi kwa mtu kupata maumivu ya mgongo ya mara kwa mara.

Kubeba vitu kwa njia sahihi, mazoezi ya mara kwa mara, na kunyoosha viungo vya mwili kabla ya mazoezi na kudumisha uzito unaofaa kiafya huweza kusaidia kuzuia matukio ya maumivu katika sehemu ya chini ya mgongo.

Maumivu katika sehemu ya chini ya mgongo kwa kawaida hutokea na huathiri watu wengi wakati fulani maishani. Watu wanaweza kudhibiti na kupunguza athari za maumivu ya sehemu ya chini ya mgongo kwa kuelewa dalili, kufanyiwa utambuzi sahihi, na kufuata mbinu za matibabu na kinga jinsi ipasavyo. Kudumisha mtindo wa maisha unaofaa kiafya, kufanya mazoezi ya mara kwa mara, na kuhakikisha ubebaji wa vitu kwa njia salama ni muhimu katika kuzuia matukio ya maumivu katika sehemu ya chini ya mgongo. Kwa kufuata utaratibu sahihi, watu wengi wanaweza kupata nafuu kubwa kutokana na maumivu ya sehemu ya chini ya mgongo na kuboresha maisha yao kwa ujumla.

S: Nini husababisha maumivu ya katika sehemu ya chini ya mgongo kwa wanawake?
J: Maumivu ya kiuno kwa wanawake yanaweza kutokea kwa sababu mbalimbali, ikiwa ni pamoja na ujauzito na kujifungua, mabadiliko ya homoni, kudhoofika kwa mifupa (osteoporosis), na magonjwa sugu kama vile endometriosisi au uvimbe katika tumbo la uzazi (uterine fibroids). 

S: Je, maumivu ya katika sehemu ya chini ya mgongo yanaweza kuzuilika?
J: Ingawa baadhi ya matukio ya maumivu ya kiuno yanaweza yasizuilike, kuna baadhi ya hatua ambazo watu wanaweza kuchukua ili kupunguza hatari ya kupata maumivu husika. Hatua hizi ni pamoja na kudumisha mkao unaofaa kiafya, kujishughulisha na kufanya mazoezi ya mara kwa mara, na kuepuka kuvuta sigara na unywaji pombe kupita kiasi. 

S: Ni dawa gani bora ya maumivu ya kiuno?
J: Dawa bora ya maumivu ya katika sehemu ya chini ya mgongo hutegemea maumivu ya mtu husika na sababu ya maumivu hayo. Dawa za kupunguza maumivu kama vile ibuprofen au paracetamol zinaweza kutoa ahueni ya muda mfupi. Hata hivyo, watu wanapaswa kupata ushauri wa mtaalamu wa afya kwa utambuzi sahihi na matibabu kulingana na mahitaji yao. 

S: Unawezaje kujua ikiwa maumivu yako ya mgongo ni ya misuli? 
J: Dalili ya kawaida ya maumivu ya misuli ya mgongo ni maumivu ambayo huongezeka wakati mwili unasogea. Maumivu ya mgongo yanayosababishwa na misuli yanaweza pia kuambatana na mshtuko wa ghafla wa misuli (muscle spasms) na kukakamaa kwa eneo lililoathirika.